Sino ako? Pagdating ko sa Al-Anon, akala ko alam ko na ang sagot sa tanong na iyon, ngunit natuklasan ko na ang lahat ng aking mga sagot ay luma na dahil matagal na akong tumigil sa pagtatanong sa aking sarili kung sino ako. Maaari kong sabihin sa iyo ang tungkol sa mga alkoholiko at lahat ng iba pa sa aking buhay-ang kanilang mga gusto at hindi gusto, opinyon, damdamin-ngunit wala akong ganoong mga sagot para sa aking sarili.
Binigyan ako ng Al-Anon ng Labindalawang Hakbang para muling tuklasin ang aking sarili. Ang paggawa ng isang masusi at walang takot na moral na imbentaryo ng aking sarili at pagbabahagi nito sa isang pinagkakatiwalaang kaibigan (Mga Hakbang Ikaapat at Ikalima) ay lubos na nakakatulong. Ito ang unang pagkakataon sa loob ng mahabang panahon na binigyan ko ng labis na atensyon ang aking sarili! Natutunan ko rin ang tungkol sa aking sarili sa pamamagitan ng pakikinig sa mga pagpupulong kapag naiuugnay ko ang aking sarili sa iba, nakakakuha ako ng maliwanag na pagkaunawa sa sarili kong mga iniisip at nararamdaman.
Sa araw na ito alam ko na ako ay isang mapagmahal, mapagbigay, may opinyon, sumpungin, tapat, mahusay makitungo, at matigas ang ulo na tao. Alam ko kung ano ang aking nararamdaman at kung ano ang iniisip ko sa iba’t ibang paksa, at namamalayan ko kapag nagbabago ang mga kaisipan at damdaming ito. Ibinalik sa akin ng Al-Anon ang tanging bagay na talagang dapat kong panatilihin: ang aking sarili.
Paalala ngayong araw
Ang rekoberi ay isang kahanga-hangang salita. Nangangahulugan ito ng pagbawi ng isang bagay. Ngayon ay susubukan kong tandaan na “ang isang bagay na iyon” ay ako.
“Kung sakaling mahanap ng isang tao ang kanyang sarili… mayroon siyang mansyon na maaari niyang tirahan nang may dignidad sa lahat ng mga araw ng kanyang buhay.”
James Michener